Муниципальное бюджетное учреждение культуры

Мугудайская модельная библиотека

РС(Якутия), Чурапчинский улус, с. Маралай, ул. Октябрьская, 54

Күндү кэрэ аҥаардарбыт!

Эһигини Саха Өрөспүүбүлүкэтин Ил Түмэнин аатыттан уонна тус бэйэм Аан дойду дьахталларын күнүнэн истиҥник эҕэрдэлиибин!

Бу сүргэни көтөҕөр сааскы бэлиэ күҥҥэ олоҕу күннэтэ сылаас, уйаҕас тыынныыр, истиҥ иэйиинэн дириҥ ис хоһооннуур, эйгэни ураннык киэргэтэр кэрэ аҥаардарга махталбытын иһирэхтик этэрбитигэр, үтүө, сырдык санаабытын аныырбытыгар тоҕоостоох түгэн.

Кулун тутар 8 күнэ хас биирдиибит сүрэҕэр күндүттэн күндү киһибит – тапталлаах ийэбит, эбэбит, кэргэммит, кыыс оҕобут, аҕаспыт-балыспыт уобараһын кытта ситимнэнэн сырдык-чаҕыл сааһы, үйэлээх тапталы, үтүөнү-кэрэни кэрэһилиир. Биһиги, эр дьон, олохпут үгүс түбүктэрин, кыһалҕаларын сөптөөхтүк быһаарарбытыгар, араас буомнарын этэҥҥэ туоруурбутугар эһиги муҥура суох тулуургут, өйөбүлгүт уонна тапталгыт төһүү күүс-көмө буолар. Дьахтар амарах-аһыныгас санаата, нарын-уйан кута-сүрэ, иһирэх кыһамньыта аан дойдуга үтүөнү үксэтэр, үчүгэйгэ кынаттыыр ураты кыахтаах.

Аныгы балысхан тэтимнээх олоххо далбар хотун алаһа дьиэ араҥаччыта, үгэс буолбут олох сиэрин-майгытын харааннааччы эрэ буолбакка, уопсастыба өйөбүлэ, тирэҕэ буолар. Эһиги араас быһыыга-майгыга мындыр санааҕытынан уустугу тобуларгытын, ураты көрүүгүтүнэн саҥа-сонун быһаарыныылары ылынаргытын, үрдүк таһымнаах айымньылаах үлэҕитин, олоххо тулуургутун-дьулуургутун сөҕөбүт-махтайабыт.

Олоххутугар чугас дьоҥҥут тапталларынан угуттаммыт, сылааһынан илгийэр дьоллоох түгэннэр, чаҕылхай, кэрэ-бэлиэ күннэр үгүс буоллуннар. Дьаҥ-дьаһах тумуннун, үөрүү-көтүү аргыстастын, баҕа санааларгыт барҕара туоллуннар! Бөҕө туругу, чэгиэн доруобуйаны, этэҥҥэ буолууну баҕарабын.

Үтүө, нарын майгыгыт, хатыламмат кэрэҕит өрүү тупса-киэркэйэ туруохтун!

Саха Өрөспүүбүлүкэтин

Ил Түмэнин Бэрэссэдээтэлэ А.И. Еремеев

Добавить комментарий

Ваш адрес email не будет опубликован. Обязательные поля помечены *