Саҥа кинигэ сүрэхтэннэ!
Дьоро түгэнинэн, күндү биир дойдулаахтарым!
Бэҕэһээ тохсунньу 29 күнүгэр ааспыты анаарар, кэлэри кэрэһэлиир өссө биир кинигэ, «ТИМИР КӨЛӨНҮ МУОҺАЛААБЫТ ТУРУУ ҮЛЭҺИТ ДЬОММУТ» кинигэ, сүрэхтэниитэ буолан ааста.
Кинигэҕэ Мугудай, Төлөй нэһилиэктэригэр араас сылларга үлэлээн ааспыт тыйыс тымныыга, өҥүрүк куйааска тимир көлө аргыстаах хоһуун дьоммут туһунан сырдатыллар. Дьокуускай «Дани-Алмас» кинигэ кыһатыгар 324 страницалаах 150 ахсаанынан бэчээттэнэн таҕыста.
Кинигэ сылларынан араарылынна:
1. 1932-1955 сыллар: Оройуоҥҥа бастакы тырахтарыыстар.
2. 1955-1974 сыллар:
- Калинин холкуос салайааччылара,
- Калинин холкуос механизатордара,
- Калинин холкуос суоппардара.
3. 1974-1995 сыллар:
— Мастарыскыай тутаах үлэһиттэрэ
— Хаһыат страницатыгар туруу үлэһит дьоммут
— Саһарбыт хаартыскалар кэпсииллэр
— Туруу үлэһит дьон ахтыылара
Барыта 154 киһи ахтыылара, хаартыскалара, куйаар кодунан кэпсээннэрэ киирдилэр. Тимир көлөнү тэһииннээбит биир дойдулаахтарбытын сырдатар кинигэ оҥоһулларыгар көҕүлээбит, үбүнэн көмөлөспүт киһинэн нэһилиэкпит баһылыга Николай Иннокентьевич Аммосов буолар. Үлэтин аартыгын суоппартан саҕалаабыт, бииргэ алтыспыт, истиҥник саныыр дьонугар махталын бэлиэтэ бу кинигэ буоларын кини бэлиэтээн этэр.
Улахан үлэҕэ көмө-соргу буолбут, ахтыыларын суруйбут, хаартыскаларын биэрбит дьоммутугар-сэргэбитигэр махтал тыллары тиэрдэбин. Кинигэ Мугудай, Төлөй нэһилиэктэрин Бочуоттаах олохтооҕо Иван Андреевич Пинигин быһаччы салайыытынан, хомуйсан оҥоруутунан таҕыста. Кинигэ редактора — СР үөрэҕириитин туйгуна, Д.П.Коркин аатынан оскуола саха тылын, литературатын учуутала, элбэх кинигэ редактора Акулина Николаевна Кузьмина.
Кинигэ — сүппэт-оспот өйдөбүнньүк. Хас биирдии көлүөнэ кыайыылаах, хотуулаах үлэтэ, хайдах олоҕу олорбута суруллан хаалара кэнчээри ыччакка үтүө өйдөбүл буолан хаалыаҕа!
Хомуйан оҥорооччу — Евдокия Дмитриевна Попова, СР культуратын туйгуна
Просим принять участие в опросе и ответить на вопросы анкеты "Оценка удовлетворенности работой организации"
по ссылке
https://forms.mkrf.ru/e/2579/xTPLeBU7/?ap_orgcode=150220478
или QR коду
