Мугудайская модельная библиотека

Сивцев Афанасий Васильевич

(1929-1956 сс.)

Мугудай нэһилиэгин чулуу ыччата. Учуутал, пионер баһаатайа, нэһилиэк комсомольскай тэрилтэтин салайааччыта. Нэһилиэк ыччатын көҕүлээн стадиону туттарбыта, Лыбынтах механизированнай ферматын тутуутун саҕаласпыта, нэһилиэккэ культурнай олоҕу көҕүлээччи. 

   Сивцев Афанасий Васильевич Уу Оҕустаахтан төрүттээх. Аҕата Архыып сайылыгар олохтоох Моороҕой Мэхээлэ үһүс уола Нуучча Баһылай. Василий Михайлович колхозка араас үлэҕэ сылдьыбыта, удьуор мас ууһа. Кэргэнэ Лукерья Устиовна Толстоуховалыын «Сайдыы» колхуос чилиэннэрэ, түөрт оҕоломмуттара. Аҕа дойду Улуу сэриитигэр балаҕан ыйыгар 1941 сыллаахха ыҥырыллан барбыта, Москва анныгар сураҕа суох сүүппүтэ. Афанасий бииргэ төрөөбүттэрэ Татьяна, Михаил Сивцевтэр.   

   Мугудай оскуолатын биир чаҕылхай үөрэнээччитэ 1943 сыллаахха 6-с кылааһы бүтэрбитигэр оскуола сабыллыбыта. Онон ийэтэ Сылан оскуолатыгар остуораһынан үлэлии барбыта, Афоня онно тахсан 7-с кылааһы туйгун сыананан үөрэнэн бүтэрбитэ уонна Чурапчытааҕы педагогическай училищеҕа экзамена суох быһа үөрэххэ киирбитэ.

   Афанасий Васильевич Сивцев – Чурапчытааҕы педагогическай училище XI выпуһун биир саамай чаҕылхай туйгун үөрэнээччитэ 1944-1947 сылларга үөрэнэн, училищены кыһыл дипломунан бүтэрбитэ. Мугудайга олорон-үлэлээн ааспыт учууталлары Сивцев Д.В., Сивцев Е.И., Федорова М.О. кытта бииргэ үөрэммиттэрэ. ЧПУ-ну бүтэрэн, хоту Булуҥ оройуонун Күһүүр оскуолатыгар үлэлии барбыта. 1950 сыллаахха оройуонугар эргиллэн, Мындаҕаайы ситэтэ суох орто оскуолатыгар учууталлаабыта. 1951 сыллаахха Советскай Армия кэккэтигэр Кенигсберг куоракка сулууспалаабыта, байыаннай-политическай бэлэмнэнии туйгуна буолан дойдутугар эргиллибитэ. Мугудай ситэтэ суох орто оскуолатыгар 1954-1956 сылларга нуучча тылын учууталынан, пионер баһаатайынан, физкультура учууталынан үлэлээбитэ, ону таһынан нэһилиэк комсомольскай тэрилтэтин салайара. Оскуолаҕа пионерскай хамсааһын үлэтигэр күүстээхтик ылсыбыта, пионерскай дружинаҕа Советскай Союз Геройа Ф.К.Попов аатын иҥэрэри ситиспитэ.

А.В.Сивцев ити үлэлии сылдьан нэһилиэк ыччатын көҕүлээн стадиону туттарбыта, Лыбынтах механизированнай ферматын тутуутун саҕалаабыттара, оройуоҥҥа уус-уран самодеятельноһы көрүүгэ куруук инники күөҥҥэ сылдьаллара. Үрдүк культуралаах, киэҥ билиилээх нэһилиэк чулуу ыччатын Чурапчыга үлэҕэ ылбыттара. Оройуон киинигэр орто оскуолаҕа учууталлаабыта, Комсомол райкомугар пионерскай отделы салайбыта.

Доруобуйата мөлтөөн, баара-суоҕа 27 сааһыгар бу орто дойдуттан барбыта, көмүс уҥуоҕа дойдутугар хараллыбыта.

Хомуйан бэлэмнээтэ

Е.Д.Попова 

Сивцев Афанасий Васильевич

(1929-1956 сс.)

• Сивцев Афанасий Васильевич «Сайдыы» колхуос Уу Оҕустааҕыттан төрүттээх,
• 1937-1943 сс. — Мугудай оскуолатын чаҕылхай үөрэнээччитэ,
• 1943-1944 сс. оскуола начаалынай буолан Сылан оскуолатыгар 7-с кылааһы туйгун сыананан үөрэнэн бүтэрбитэ,
•  1944 с. — Чурапчытааҕы педагогическай училищеҕа экзамена суох быһа үөрэххэ киирбитэ,
• 1947 с. училищены кыһыл дипломунан бүтэрбитэ,
• 1947-1950сс. Булуҥ оройуонун Күһүүр оскуолатыгар учууталлаабыта,
• 1950 с. Мындаҕаайы ситэтэ суох орто оскуолатыгар учууталлаабыта,
• 1951-1953 сс. Советскай Армия кэккэтигэр сулууспалаабыта, байыаннай-политическай бэлэмнэнии туйгуна, 
• 1954-1956 сс. Мугудай ситэтэ суох орто оскуолатыгар учууталынан, пионер баһаатайынан үлэлээбитэ, нэһилиэк комсомольскай тэрилтэтин салайбыта,
• Оскуолаҕа пионерскай дружинаҕа Советскай Союз Геройа Ф.К.Попов аатын иҥэрэри ситиспитэ,
• Нэһилиэк ыччатын көҕүлээн стадиону туттарбыта, Лыбынтах механизированнай ферматын тутуутун саҕаласпыта,
• 1956 с. Чурапчы орто оскуолатыгар учууталлаабыта, Комсомол райкомугар пионерскай отделы салайбыта,
• 1956 с. орто дойдуттан барбыта, көмүс уҥуоҕа дойдутугар хараллыбыта.