Мугудайская модельная библиотека

Мугудай нэһилиэгин “Күбэйэ” дьахталлар түмсүүлэрэ сылы эргиччи араас сэргэх тэрээһиннэри, маастар-кылаастары тэрийэн, дьон-сэргэ, ордук дьиэ хаһаайкалара, кэрэ аҥаардар сынньалаҥнарын көдьүүстээхтик атаараллар, уопсастыбаннай үлэҕэ көхтөөхтүк кытталлар.

Бу күннэргэ Радислав Катаков салайар “Эйгэ” НАДь уонна Евдокия Катакова салайар “Күбэйэ” түмсүү тэрийиилэринэн, туоһунан саха төрүт иһиттэрин  тигиигэ улахан маастар-кылаас ыытылынна.

Тэрээһин үөрүүлээх аһыллыытыгар нэһилиэк баһылыга Николай Аммосов,  бибилэтиэкэр Евдокия Попова, “Күбэйэ” түмсүү салайааччыта Евдокия Катакова, норуот маастара Александра Оконешникова ыалдьыттары Мугудай сиригэр-уотугар үктэммиттэринэн эҕэрдэлээтилэр, туоһунан тигии историятын билиһиннэрдилэр, саҥа тутуллубут балаҕаны көрдөрдүлэр. Түмсүү чилиэннэрэ мустубут дьону арыылаах алаадьынан күндүлээтилэр.

Кэлиҥҥи кэмҥэ туоһунан иистэнии көрүҥэ симэлийэ быһыытыйда. Онон маннык оҥоһуктары оҥоруу ньымаларын сөргүтүүгэ, кистэлэҥнэрин үллэстиигэ нэһилиэк уран тарбахтаах маастардара – СӨ норуот маастара Александра Оконешникова уонна кини үөрэнээччитэ, Саха Өрөспүүбүлүкэтин уус-уран оҥоһуктарын маастара Сардаана Скрябина туһааннаах маастар-кылааһы салайдылар. Икки күн устата ыытыллыбыт тэрээһиҥҥэ Дириҥтэн, Мындаҕаайыттан, Алаҕартан, Төлөйтөн, Чурапчыттан, Хатылыттан уонна Одьулуунтан кэлэн кытыннылар. Кинилэр туос ыаҕыйаны тигии ньымаларын баһылаан, элбэҕи билэн-көрөн, бэйэ-бэйэлэрин кытта уопут атастаһан, сэргэхсийэн тарҕастылар. “Ымсыыра көрөр туос иһиттэрбитин аны бэйэбит оҥорорго үөрэннибит. Олус көдьүүстээх маастар-кылааһы тэрийбиккитинэн, истиҥник махтанабыт. Туос тигиитин сэргээччилэр элбии турдуннар, уһуйааччыларгыт сайдан-тэнийэн истиннэр, уран оҥоһуктаргытынан умсугута, кэрэхсэтэ туруҥ”, — диэн махтал, алгыс тылларын анаатылар.

Итинтэн сиэттэрэн сырдаттахха, “Күбэйэ” түмсүү чилиэннэрэ нэһилиэктэрин иһигэр эдэр хаһаайкаларга, Далбар хотуттарга анаан саха төрүт ииһигэр – сахалыы таҥаһы, кыбытыгынан аттаран тигиигэ, оҕуруонан тиһиигэ, кылынан-сиэлинэн өрүүгэ анаммыт маастар-кылааһы тиһиктээхтик ыыталлар, араас таһымнаах быыстапкаларга көхтөөхтүк кытталлар. Итини тэҥэ байыаннай дьайыыга сылдьар биир дойдулаахтарбытыгар анаан, илиилэрин сылааһын иҥэрэн, кылынан-сиэлинэн өрүллүбүт угунньалары бэлэмнээн ыыппыттар.  “Күбэйэлэр”  регионнааҕы “Үрүҥ көмүс” волонтердар  түмсүүлэрин кытта ыкса сибээһи тутан үлэлэһэллэр.    Бу соторутааҕыта кинилэргэ анаан сылгы сиэлинэн, кылынан угунньаны оҥорууга маастар-кылааһы тэрийэн, улаханнык кэрэхсэппиттэр.

Анна Захарова Мугудайга туоһунан саха төрүт иһиттэрин тигиигэ үөрэттилэр — Улус Медиа