Мугудайская модельная библиотека

Ыам ыйын 28 күнүгэр аан дойдутааҕы дьиэ кэргэн күнүнэн Арассыыйатааҕы «Библионочь» акция чэрчитинэн дьиэ кэргэнинэн «АВТОКВЕСТ» күрэх нэһилиэккэ аан бастакытын ыытылынна.

Манна массыынанан сылдьан араас сорудахтары толорууга 6 дьиэ кэргэн олус көхтөөхтүк кытыннылар: Вера, Владимир Баишевтар, Туйаара, Радислав Катаковтар, Евдокия, Александр Колтовскойдар, Мария, Валерьян Сивцевтэр, Айсена, Иван Чин-Фулар, Анастасия, Петр Яковлевтар.

Сорудахтарга нэһилиэк бэлиэ сирдэрин, өйдөбүнньүктэрин анал таайбараҥнаах ыйынньыктарынан булуу, видеоҕа устуу, суол быраабылатын билиини тургутан көрүү киирдилэр.

Дьиэ кэргэн оҕолорун кытта бииргэ өрө күүрүүлээхтик күрэстэспиттэрин түмүгүнэн кыайыыны Мария, Валерьян Сивцевтэр оҕолорунаан ситистилэр. Иккис миэстэни Анастасия, Петр Яковлевтар оҕолорунаан ыллылар, үһүс миэстэҕэ Вера, Владимир Баишевтар таҕыстылар.

Маны таһынан бу күн СӨ Национальнай библиотекатын көҕүлээһининэн тэриллэр «Сила Книги» акцияҕа ааҕааччылар Анелия Корякина, Айыына, Сардаана Поповалар көхтөөхтүк кытыннылар. «Мин  дьиэ кэргэним» аһаҕас халлаан анныгар оҕолорго уруһуй күрэһэ, сибэкки, оҕуруот аһын рассаадатын атыыта үөрүүлээх быһыыга-майгыга ыытылынна.

Бу бэлиэ күн нэһилиэнньэ өйүгэр-санаатыгар үтүө өйдөбүлү хаалларар гына чаҕылхайдык, өрө көтөҕүллүүлээхтик ааста. Күрэхтэһиигэ кыттыбыт бары дьиэ кэргэттэргэ, оҕолорго үгүс үөрүүнү-көтүүнү, чэгиэн туругу баҕарабыт!

Наталья Сибирякова Мугудайга интэриэһинэй тэрээһин ыытылынна — Улус Медиа